نكات سودانية 100%

من طرف Husam-xp الأحد 6 سبتمبر - 10:05

رباطابى وشايقى سكاهم مرفعين (حيوان مفترس) وقاموا جاريين والمرفعين وراهم وبعد مسافة قام الشايقى قال للرباطابى :
ياخوى ما تشوف ليك تراب تكشح المرفعين دة قام الرباطابى قال ليه: وانت جارى فى برش ؟

......................................

رباطابي خنق فى الاكل قال لبنتة ادينى موية قالت ليه شراب يا ابوي؟ قال ليها لا كبسولات

...........................

في واحد اعور غمز للبت بعينو الكويسة قام دقش عمود الكهربا

.................................

واحد رباطابى رسلو ليهو جزمه جميله هدية قام سافر بيها الخرطوم وهناك انشرطت وداها لبتاع الجزم يخيطهاوقال ليهو: مستعجل
صاحبنا قال بعشرين الف جنيه قام الرباطابى قال ليهو: ليه أصلو بتخيطا بى بنج؟

.....................................

الدروب سافر الى كسلا بحافلة جديدة لنج والسواق من قام لحدي ما وصل مشغل اذاعة القران وصاحبنا الشغلة دى ما ركبت ليهو فى راسه ولما وصل سأله واحد من اقربائه جيت بشنوا؟؟ فرد عليه : جيت بالجامع ده

........................................

مرة واحد مسطول قاعد جنب موية المطرة ومبسوط جداً من منظر الموية الكتيرة , قام جاء واحد راكب عربية عاوز يعدي في الموية وخايف وسأل المسطول هل ممكن أعدي ؟ ورد عليه المسطول طبعاً مافي مشكلة . ولما مشى شويه العربية غرقت وطلع منها السواق زعلان من المسطول وقال ليهو: ماقلت مافي مشكلة , رد عليه المسطول: والله حسي دي جات بطة مشت عديل

......................................

واحد قرايبنا لأول مرة يدخل المستشفى وكانت حرارته عالية جداً جداً 00 المهم الدكتور قام دخّل ليهو التيرمومتر في خشمه 00 قام قريبنا قال ليهو 00 مص ولا أقرمشه يا دكتور

..............................................

واحد خياط عرس مرة طويلة.....بعد مدة زهج منها...قام كفّاها

...............................................

واحد مسطلاتي عاطل ساكن مع ضابط جيش في يوم قرأ عن وظيفة وكان لازم يصحى الصباح بدري عشان المعاينة قام وصى الغفير يصحيه ،الصباح لمن صحاه الغفير قام المسطول باستعجال لبس ومرق في الشارع لاحظ انو العساكر بحيهو واستغرب جدا بعد شوية عاين لهدومو لقاه هدوم جيش قام قال: بالله شوف الغفير المغفل ده أقول ليهو صحيني يصحي الضابط. قديمة لكن عليكم الله تضحكوا

.........................................

واحد رباطابي لابس نظارة لاقاهو شافع في الشارع قاليهو : يا أب نظارة ، نظارتك دي نظر قاليهو: لأ شم

..........................................

واحد موظف حالته تعبانه زوجته ولدت ،الدكتور قال ليه:شوف ليك مرضعة لولدك لأن زوجتك عندها مشكلة فى ادرار اللبن،بعد بحث مضنى زوجته وجدت مرضعة واتفقت معاها،زوجها سألهااتفقتى معاها بكم؟ قالت ليه:غايتو بعد تعب اتفقنا على أربعين ألف،قال ليها بانفعال:ليه؟انا مرتبى كله خمسين ألف ، خلاص نديها العشرة ألف الباقية ونرضع كلنا

..................................................

في واحد كان راكب الحافلة والحافله خلاص اتملت ومافي مكان وعمنا ده كان راكب مع الباب بعدين جاء واحد شاب وقال ليه يا حاج الحافله دي ماشه وين قال ليه يا ولدى افرض لو قلنا الحافله دى ماشه بيتكم بتركب وين.

..................................................

واحد رباطابى معزوم عشاء مع واحد صاحبو مشى لقى الكهرباء قاطعة عن صاحبو قعدو يتونسو مسافة الرباطابى جاع جوعه شديدة قال لى صاحبو ياخى الزمن فات وانا جيعان ياخى طلع لينا العشاء داء صاحبو قال لية ياخى العشاء ما بطلع الا الكهرباء تجى... الرباطابى قال لى اصلو عشاء ولا شريط فديو

..................................................

قطر كريمة كان زحمة شديدة جدا ، واحد معاه ولدوا الصغير يادوب لقي ليهو مساحة نام في الممر ،وولدو نام جنبو ، والدنيا ليل ، قام الرجل صحي فجأة ما لقي ولدو الصغير راقد جنبو ، فقام يفتش عليهو والدنيا ظلام شديد ، ولسوء حظه قام لكز واحد رباطابي نايم جنبو وصحاه من النوم ، فقام الرباطابي زعل وقال للراجل :- يازول بتلاكز مالك ؟ قام الراجل قال ليهو :- ياخوي بفتش علي ولدي ..... قام الرباطابي رد عليهو بزعل :- ولدك دا إبريق ؟ ماتكوركلو

.............................................

أثنين زملاء وأصحاب جدا شغالين في شركة الكهرباء أبو واحد منهم توفي ، فزميله لم يعزيه في وفاة أبوه ، ولم يشاطره أحزانه ، وشاء الله أن يتوفي أبو الآخر بعد شهر ، وطبيعي أن زميله لا يعزيه ، لأنه لم يعزيه في وفاة أبوه التي حدثت أولا ، فقابله زميله وهو زعلان وقال ليهو :- بالله مش عيب عليك ، نحن أصحاب وزملاء وأصدقاء ، أبوي يموت ماتجي تعزيني فيهو ؟؟؟؟ فرد عليهو زميله :- باللـــــــــه !!!!! والدفناهو قبل شهر داك كان كيــبــــل !!!!

.......................................................

واحد من أدعياء الشعر ، قابل الشاعر عمر البنا ( الذي اشتهر بالصراحة الشديدة والوضوح ) واعطاه قصيدة ليعرف رأيه في موهبته ، وجاء في القصيدة/
مابين الشتاء والصيف توجد فواصـل والزول البريدو حبو سكن المـفاصـــل
فرد عليه الشاعر عمر البنا :- ياولدي .... إنت ما عندك شعر .... إنت عندك رطــوبـــة ... أمشي الدكتور أكشـف ....

......................................

ولد رباطابي قال لأبوه : أبوي أبوي شوف الفار
قال ليهو : وإنت قايلني كديس؟؟
قال: أنا قلت ليك أكله؟؟؟

..........................................

فى واحد ماشى وراء بنت فى الشارع وقاعد يشاغلها قال ليها:ماشه سريع كده وراك موعد؟
التفتت وقالت ليه: لا وراى حمار !!!

............................................

راجل جا خاش البيت زهجان لمن روحو مارقة، لاقا مرتو قاليها: انتو يا النسوان ما بتعرفو اصو كلمة هاك بس بتعرفو تقولو جيب جيب جيب ,قامت مرتو قالت لي ما تزعل، هاك البطاطس دي قشرا لي !!!!!!!!!!

..........................

سودانية ولبنانية واماراتية ركبوا الطيارة، الطيارة وقعت في البحر فرق الانقاذ جاية تنقذهم الاماراتية طلعت يدينها مليانات دهب قالت عشان فرقة الانقاذ يشوفو الدهب يشيلوه وينقذوها هي اول واحدة اللبنانية طلعت رقبتها وشعرها الجميل قالت عشان يشوفو جمالها يطلعوها اول واحدة السودانية غطست فى الموية طلعت صلبها قالت عشان يقولو ده الصندوق الاسود

......................................................

واحد اسمه بلة شين شنه شديدة جاوا رباطابي يبارك ليهو مولوده الجديد شاف المولود شين زي ابوه قال ليهو حقو تسميه زاد الطين ............( بقى اسمه زاد الطين بلة )

......................................

أتمنى أن تنال إعجابكم

الله يرجك والله نكات خطيره........بس انتوا ثبتوا الرباطابي في النكته
الاخيره والله جابها عالجرح...
وشكرا يا حسام......

من طرف دوشكا الإثنين 7 سبتمبر - 7:33

نكت جميله جدا ههههههههههههههههههههههههههههههههههه

هههههههههههههههههههه100#

من طرف **Admin** الإثنين 7 سبتمبر - 9:00

ههههههههههههههههههههههههههههههههههه
والله خطيره
واحلى اتنين .........

أثنين زملاء وأصحاب جدا شغالين في شركة الكهرباء أبو واحد منهم توفي ،
فزميله لم يعزيه في وفاة أبوه ، ولم يشاطره أحزانه ، وشاء الله أن يتوفي
أبو الآخر بعد شهر ، وطبيعي أن زميله لا يعزيه ، لأنه لم يعزيه في وفاة
أبوه التي حدثت أولا ، فقابله زميله وهو زعلان وقال ليهو :- بالله مش عيب
عليك ، نحن أصحاب وزملاء وأصدقاء ، أبوي يموت ماتجي تعزيني فيهو ؟؟؟؟ فرد
عليهو زميله :- باللـــــــــه !!!!! والدفناهو قبل شهر داك كان
كيــبــــل !!!!
--------------------------------------------------------------
واحد اسمه بلة شين شنه شديدة جاوا رباطابي يبارك ليهو مولوده الجديد شاف
المولود شين زي ابوه قال ليهو حقو تسميه زاد الطين ............( بقى اسمه
زاد الطين بلة )